Poppenspäler Wagen – Vocke Popp

Hängt die Marionette “Vocke Popp” unter dem Vordach, heißt es “BITTE HEREINSPAZIERT”
Wir danken der Gardinger Puppenspielerin Marianne Vocke für den “Lütt Kerl”!

 

De Vock’sche Popp Bernd Volkers

In Gaarn bün ick born op den Mückenbarg as echte Vock’sche Popp,
Ut Pappmaschee un mit Struwwelhoar op een markanten Kopp.
Min Profession weer vörbestimmt, Dirigent schull ick mol warn.
Man denn is dat ganz anners kom, ick bün nu wech vun Gaarn.

Mit Taktstock, Frack un Arienleed har ick nix in Sinn,
Kunn beter luudhals Hoppla prahlen un Lüüd in Stimmung bring’!
So keem dat wie dat kamen mutt, se hebbt mi utsorteert,
een Anner worr nu Dirigent, mi hebbt se afstaffeert.

Lang leeg min Kopp op de Finsterbank, har keen Been un Arm,
Keen Taktstock, keen Melonenhoot, wat kunn ut mi noch warn?
Min Hoar worr struw und lichterlich, blass und stuff min Huut,
Dat Allerschlimmste aber weer för mi: keen een keek na mi ut.

Eenes Dages keem Stadtlüüd to Besök un vertelln so nebenbi,
In Husum ward een Possen fri, man söcht een Kerl as mi!
De schall dor bi den Poppenwogn Lüüd to’d Rinkamen animeern.
Dorför weer ick de Richtige, se wüllt mi angascheern!

Moder Vocke sä, na denn man to, dat ward lütt Kerl wohl lieden,
Hier sünd twee Arms un Been dorto, een Hoot schall he ok kriegen.
De Antoch mütt jem sülber neihn, he brukt ok een Poor Schoh,
Ick freu mi so, atschüß lütt Kerl, nu warst ok du noch froh.

So wor ick ganz nie utstaffeert, strohblond, dat vulle Hoor
Reckt vun den Melonenhoot hendaal meist bet an dat Ohr.
Schwatte Schoh un schwatte Büx, elegant vun Kopp bet Foot,
Un de kareerte Schottenjack steiht mi besünners goot.

Hochdeutsch schnack ich vornehm nu – prahl ut vulle Kehl,
„Hereinspaziert, jüm leven Lüüd, besökt us Poppenspeel!“
Ick bün nu wiedhenn stadtbekannt mit min markanten Kopp,
Keen een seggt mehr „Lütt Kerl“ to mi, ick heet nu

Vocke Popp !